ओमानमा नेपाली क्रिकेट टिमको तयारी

राष्ट्रिय

गृहपृष्ठ
ओमानमा नेपाली क्रिकेट टिमको तयारी

म्याग्दी न्युज संवाददाता शुक्रबार, भदौ ११, २०७८

काठमाडौं । आईसीसी क्रिकेट विश्वकप लिग–२ अन्तर्गत त्रिकोणात्मक सिरिज र पपुवा न्युगिनी ९पीएनजी०सँगको एकदिवसीय खेलका लागि नेपाली क्रिकेट टिम हाल ओमानमा छ । सिरिजका लागि ओमान पुगेका नेपाली टोलीले अन्तिम तयारी समेत शुरु गरेको छ । नेपाल, ओमान र अमेरिका सम्मिलित लिग–२ सिरिज सेप्टेम्बर १३ देखि २० सम्म हुनेछ ।ओमान पुगेपछि नेपाली खेलाडी र अफिसियलको कोरोना परीक्षण रिपोर्ट नेगेटिभ आएपछि टोलीले बिहीबार प्रशिक्षण शुरु गरेको हो । नेपालले लिग–२ सिरिजअघि पीएनजीसँग सेप्टेम्बर ५ र ८ मा एकदिवसीय खेल खेल्नेछ । त्यसपछि नेपालले लिग–२ अन्तर्गत पहिलो खेल अमेरिकासँग सेप्टेम्बर १३ मा खेल्नेछ । ज्ञानेन्द्र मल्लको कप्तानीमा यस पटक १७ सदस्यीय टोली ओमान गएको छ । जसमा गुल्शन झा नयाँ अनुहारको रुपमा छन् । गुल्शनसँगै विक्रम सोव, कुशल भुर्तेल र आसिफ शेखले नेपालका लागि एकदिवसीय अन्तर्राष्ट्रियमा डेब्यु गर्न बाँकी छ । गत वैैशाखमा नेपालमै भएको टी–२० त्रिकोणात्मक सिरिजमार्फत टी २० अन्तर्राष्ट्रियमा डेब्यु गर्दै ओपनिङ गरेका कुशल भुर्तेल र आसिफ शेखले यस पटक एकदिवसीय अन्तर्राष्ट्रियमा पनि ओपनिङ गर्ने सम्भावना छ । सन् २०२० फेब्रुअरीमा नेपालमै लिग २ को सिरिज खेलेपछि नेपालले पहिलो पटक एकदिवसीय अन्तर्राष्ट्रिय खेल्न लागेको हो । तस्वीर सौजन्य : नेपाल क्रिकेट संघ (क्यान) अनलाइनखबरबाट

प्रकाशित मिति: शुक्रबार, भदौ ११, २०७८ १६:१३