एजेन्सी । उत्तर कोरिया मलको अभावसँग जुझिरहेको छ । यसलाई मध्यनजर गर्दै किम जोङ उहाँले जनतालाई नयाँ अचम्म लाग्दो उर्दी जारी गर्नुभएको छ । आदेशमा भनिएको छ,‘देशका प्रत्येक सक्षम नागरिकले मलका लागि २०० किलोग्राम मानव अपशिष्टको योगदान गर्नु ।’ यसबाट बाली राम्रो हुनेछ र भोकमरी मेटिने छ ।
यसो नगरेमा जरिवाना लगाइने पनि उर्दीमा भनिएको छ । गत वर्ष सरकारले प्रत्येक नागरिकलाई जनवरी महिनाको पहिलो अर्धवार्षिक अवधिमा १०० किलोग्राम मानव मल उपलब्ध गराउन भनिएको थियो । यसलाई यो वर्ष दुई गुणा बनाइएको हो । एक रिपोर्टका अनुसार सरकारी कम्पनीलाई पनि ५०० किलो मानव अपशिष्टको योगदान गर्न भनिएको छ ।
यो जानकारी उत्तर कोरिया र चीनको सीमामा मोबाइल फोनको माध्यमबाट एक अर्कासँग खबरको आदान प्रदान गर्नेहरूबाट प्राप्त भएको हो । त्यहाँको ठुलो जनसङ्ख्या भोकमरीको शिकार भएपछि सरकारले खेतमा मलका लागि मानव अपशिष्टको प्रयोगलाई बढाउँदै लगेको छ । उत्तर कोरिया रासायनिक मल र युरियाका लागि चीनमाथि निर्भर रहँदै आएको छ । कोरियासँग खेतीका लागि आवश्यक मेसिनरी र उपकरण पनि छैन । कोरोनाका कारण गत २ वर्षदेखि सीमा सील पनि गरिएको छ ।
यसै कारणले युरियाको आयात पनि गर्न सकिएको छैन । केही वर्षदेखि आएको बेमौसमी बाढी र आँधीले पनि कोरियाको बालीमा नोक्सानी पुर्याएको थियो । यसले उत्पादनमा समेत कमी आएको छ । यसै कारणले उत्तर कोरियाको २.५८ करोड जनसङ्ख्याको ठुलो हिस्सामा भोकमरी देखा परेको बताइएको छ । गत वर्ष ४० लाख टन भन्दा कम अन्न उत्पादन भएको थियो । विज्ञका अनुसार यो देशका जनताको पेट भर्न ५२ लाख टन अन्नको आवश्यकता पर्छ । अर्थात् माग भन्दा २१ प्रतिशत कम अन्न उत्पादन भएको थियो । रातोपाटीबाट
प्रकाशित मिति: बुधबार, माघ १२, २०७८ १४:२७
