बेनी । प्रतिनिधिसभा सदस्य सांसद खमबहादुर गर्बुजा ‘खम्बिर’ले खेल क्षेत्रको विकास र प्रवद्र्धनमा राज्यले प्राथमिकता दिनुपर्ने बताउनुभएको छ । शुक्रबार जिल्लाको मंगला गाउँपालिका–२,बाबियाचौरमा मंगला भलिबल संघले आयोजना गरेको प्रथम नरबहादुर भट्टचन स्मृती भलिबल रनिङ्ग शिल्ड प्रतियोगिताको उद्घाटन गर्दै सांसद गर्बुजाले यस्तो बताउनुभएको हो ।कांग्रेस म्याग्दीका सभापति समेत रहनुभएका गर्बुजाले भलिबल खेलले म्याग्दीको पहिचान स्थापित गरेकाले खेलकुद गतिविधिबाट समेत जिल्लाको नाम चिनाउन सकिने बताउनुभयो ।उहाँले खेलाडीको प्रोत्साहन आफुले सक्दो सहयोग गर्ने प्रतिवद्धता व्यक्त गर्नुभयो ।
खेलकुद क्षेत्रलाई विस्तार र व्यवस्थित बनाउन आवश्यक रहेको बताउँदै उहाँले भन्नुभयो,‘खेलकुदको विकास, खेलाडीहरूको उन्नति र प्रगतिका लागि सबै राजनीतिक दलहरू एकताबद्ध भएर अघि बढ्नुपर्छ ।’ खेलकुद क्षेत्रको विस्तार गर्न र खेलाडीहरूलाई हौसला प्रदान गर्न आफुले पहल गर्ने प्रतिबद्धता पनि जनाउनुभयो । यसैगरी उहाँले जिल्लाको विकास र समृद्धीका लागि सबै राजनितिक दल एक हुनुपर्नेमा जोड दिनुभयो ।
मंगला गाउँपालिका अध्यक्ष सतप्रसाद रोकाले गाउँपालिकाले खेलकुद गतिविधिमा लगानीमा प्राथमिकता दिएको बताउनुभयो।उहाँले पालिका भित्र रहेका खेलकुद प्रतिभालाई सम्मान सहित जिल्ला, प्रदेश रराष्ट्रियस्तरका खेलकुद प्रतियोगितामा समेत सहभागिताको वातावरण बनाएको बताउनुभयो । प्रतियोगिताको उद्घाटन समारोहमा जिल्ला खेलकुद विकास समितिका अध्यक्ष दिनेश केसी, जिल्ला भलिबल संघ म्याग्दीका अध्यक्ष तेजेन्द्र बानियाँले समेत भलिबलमा म्याग्दीले राष्ट्रिय टोलीको कप्तान सहितका खेलाडीहरु जन्माएको बताउनुभयो ।
प्रतियोगिताको उद्घाटन सत्रमा गाउँपालिका उपाध्यक्ष प्रेमकुमारी अधिकारी, वडा नं २ का अध्यक्ष धनबहादुर खाती, वडा नं ४ का अध्यक्ष लालबहादुर रोका लगायतको उपस्थिती रहेको थियो । उद्घाटन समारोहको अध्यक्षत मंगला भलिबल संघका अध्यक्ष मुक्तमान केसी, स्वागत सचिव रामबहादुर गुरुङ र सञ्चालन सचिवालय प्रमुख कृष्णप्रसाद सापकोटाले गर्नुभएको थियो ।
समाजसेवी स्वर्गीय नरबहादुर भट्टचन स्मृति आयोजित भलिवल रनिङ्गकप प्रतियोगितामा पुरुषतर्फ प्रथम द्वितिय हुनेले क्रमशः एक लाख रुपैयाँ र ५५ हजार रुपैयाँ सहित ट्रफि मेडल र प्रमाण पत्र पुरस्कार प्रदान गरिने छ ।प्रतियोगितामा पुरुषतर्फ १३ टिमको सहभागिता रहेको छ भने खुल्ला महिला भलिवल प्रतियोगितका लागि भने दर्ता हुने क्रम जारी रहेको आयोजकले जनाएको छ । खुल्ला महिलातर्फ प्रथम र द्वितिय हुनेले क्रमशः ६० हजार रुपैयाँ र ३५ हजार रुपैयाँ पुरस्कारसहित ट्रफी, मेडल र प्रमाणपत्र पुरस्कार प्रदान गरिने छ ।
नरबहादुर भट्टचन स्मृति भलिवल रनिङ्गकपको मुख्य प्रायोजकमा स्वर्गिय भट्टचनका दुई नातीहरु स्टालिन÷ सरद शेरचन रहनुभएको छ । भने सह–प्रायोजकमा मालिका युवा क्लव÷मंगला युवा क्लव रहेका छन् । त्यस्तै जिल्ला भलिवल संघले प्राविधिक, रेफ्री र अफिसियल उपलब्ध गराएको छ । प्रतियोगिताको प्रत्येक खेलमा म्यानअफ म्याच घोषण गरिने भने प्रतियोगिताभर उत्कृष्ट खेलाडी, स्पाईकर, ब्लकर, सर्भर, डिफेन्डर, सेटर, टिमकोचको घोषणा गरिने मंगला भलिबल संघले जनाएको छ ।
