म्याग्दी । म्याग्दीको रघुगंगा गाउँपालिका–१,बेगकी वडा सचिब सरस्वती आचार्यले सामाजिक सुरक्षा भक्ता रकम किर्ते कागज गरी अनियमितता गरेपछि गाउँपालिकाले कारबाहिरको लागि सिफारिस गरेको छ । वडा सचिब आचार्यले लाभग्राहीको बैँक चेकमा आफैले हस्ताक्षर र औँठा छाप लगाएर सामाजिक सुरक्षा भक्तामा अनियमितता र हिनामिना गरेको गुनासो र उजुरी परेपछि गत असार १९ गते गाउँपालिकाले छानविन समिति गठन गरेको थियो ।
गाउँ कार्यपालिकाका प्रवक्ता समेत रहनुभएका सामाजिक विकास समितिका संयोजक मनकुमार शेरपुञ्जाको संयोजकत्वमा वडा नम्बर १ का वडा सदस्य बलमान गौचन र पञ्जिकरण शाखाका प्रमुख बसुदा पुन सदस्य रहेको तीन सदस्यीय छानविन समिति गठन गरेको थियो । असार २५ गतेबाट छानविन समितिले सामाजिक सुरक्षा भक्तामा वडा सचिबले अनियमितता गरेको प्रकरणमा आबश्यक छानविन गरेको र छानविनको क्रममा आरोप पुष्टि हुने कागजात र प्रमाणहरु संकलन भएको छानविन समितिका संयोजक शेरपुञ्जाले जानकारी दिनुभयो ।
समितिले पीडित लाभग्राही, वडा कार्यालयका कागजात र सामाजिक सुरक्षा भत्ता वितरण हुने प्रभु बैँकको रघुगंगा शाखामा समेत गएर आबश्यक कागजात, तथ्य र प्रमाणहरुको आधारमा छानविन गरेको र ७० पृष्ठ लामो प्रतिवेदन तयार गरेको थियो । उक्त प्रतिवेदन बुधवारको कार्यपालिका बैठकमा पेश भएको थियो । कार्यपालिका बैठकले छानविन समितिको निष्कर्षका आधारमा वडा सचिब आचार्यले सामाजिक सुरक्षा भत्तामा अनियमितता गरेको भेटिएको भन्दै आवश्यक कारबाहीका लागि सम्बन्धित मन्त्रालय र निकायमा सिफारिस सहित प्रतिवेदन पठाउने निर्णय गरेको गाउँपालिकाका प्रमुख प्रशासकीय अधिकृत कृष्ण प्रसाद ढकालले जानकारी दिनुभयो ।
गाउँपालिका आफैलाई कर्मचारी बारबाही गर्ने अधिकार नभएकाले आबश्यक कारबाहीको लागि सम्बन्धित निकायमा पठाउने निर्णय गरेको हो । वडा सचिब आचार्यले सामाजिक सुरक्षा पाउने बेगका टिकामा पुर्जा, रमायाँ फगामी पुन, लालमायाँ फगामी पुन र विन्दु गर्वुजा गरि चार जना व्यक्तिहरुको भक्ता आफ्नै हस्ताक्षर र आफै लिखित र औँठा छाप लगाएर रकम लिएको कागजातले पुष्टि गरेको छानविन समितिको प्रतिवेदनमा उल्लेख गरिएको छ । त्यसैगरि वडा सचिब आचार्यले मृतक गौदेवी तिलिजाको सामाजिक सुरक्षा भत्ता समेत आफैले झिक्ने गरेको भेटिएको थियो ।
वडा सचिब आचार्यले पाँच जनाको सामाजिक सुरक्षा भक्ताको १ लाख ५४ हजार २० रुपैयाँ हिनामिना गरेको र गाउँपालिकामा लाभग्राहीका आफन्तले उजुरी गरेपनि आचार्यले उक्त रकम सम्बन्धित लाभग्राहीकै खातामा जम्मा गरिदिएको भेटिएको छानविन समितिले जनाएको छ ।वडा सचिबले सामाजिक सुरक्षा भत्ता अनियमिता गरेको उजुरी पछि आचार्यलाई वडा सचिबबाट फिर्ता बोलाएर गाउँपालिकामा हाजिर गराईएको थियो । लोकसेवाबाट सिफारिस भएर आएका कर्मचारीलाई कारबाहि गर्ने अधिकार स्थानीय तहलाई नभएकाले आबश्यक छानविन गरेर कारबाहिको लागि सम्बन्धित निकायमा सिफारिस सहित पठाउने निर्णय गरिएको गाउँपालिका अध्यक्ष भवबहादुर भण्डारीले जानकारी दिनुभयो ।
प्रकाशित मिति: बिहीबार, साउन १८, २०८० २२:२४
