दग्नाम दर्मिजा समाज पोखराको ११औं बार्षिकोत्सव

म्याग्दी

गृहपृष्ठ
दग्नाम दर्मिजा समाज पोखराको ११औं बार्षिकोत्सव

म्याग्दी न्युज संवाददाता आइतबार, माघ २८, २०८०

IMG_E6393-scaled

पोखरा । म्याग्दीको रघुगंगा गाउँपालिका–४ दग्नामबाट विभिन्न सिलसिलामा पोखरामा बसोबास गर्दै आएका दग्नामवासीको साझा संस्था दग्नाम दर्मिजा समाज पोखराले आफ्नो ११औँ वार्षिकोत्सव तथा सम्मान कार्यक्रम सम्पन्न गरेको छ । शनिबार पोखरा–हेमजास्थित दुरलुङ्ग समाजको सभाहलमा आयोजित समारोहमा समाजको एक दशक लामो यात्रा, योगदान र आगामी योजनाबारे चर्चा गरिएको थियो । उक्त समाहरोको उद्घाटन प्रतिनिधिसभा सदस्य खमबहखदुर गर्बुजा ‘खम्विर’ले गर्नुभयो ।

कार्यक्रमका प्रमुख अतिथि एवं प्रतिनिधिसभा सदस्य गर्बुजाले समाजले १० वर्ष पूरा गरी ११औँ वर्षमा प्रवेश गरेकोमा शुभकामना व्यक्त गर्दै सुख–दुःखमा एकअर्कालाई साथ दिने र सामाजिक एकता कायम राख्ने काममा समाजको भूमिका महत्वपूर्ण हुने बताउनुभयो । उहाँले दग्नामको मौलिक कला, संस्कृति र परम्पराको संरक्षण तथा प्रवर्द्धनका लागि सबै एकजुट हुनुपर्नेमा जोड दिनुभयो । बेलायती सेनाबाट सेवानिवृत्त भएपछि व्यक्तिगत सुखसुविधाभन्दा जनताको सेवामा लाग्ने उद्देश्यले सक्रिय भएको बताउँदै उहाँले म्याग्दीको विकास र समृद्धिका लागि स्थानीय तहदेखि प्रदेश र संघीय सरकारसम्म आवश्यक पहल गर्ने प्रतिबद्धता व्यक्त गर्नुभयो ।

रघुगंगा गाउँपालिका–४ का वडा अध्यक्ष पविन गर्बुजाले दग्नामलाई सुखी, समृद्ध र विकसित बनाउन आफूले कुनै कसर बाँकी नराख्ने प्रतिबद्धता व्यक्त गर्नुभयो । जनताको चाहना र भावनाअनुसार विकास निर्माणका काम अघि बढाउँदै दग्नामलाई म्याग्दीमा मात्र नभई देशमै चिनाउने गरी काम गर्ने उहाँको भनाइ थियो ।

समाजका सल्लाहकार तथा संस्थापक अध्यक्ष धनबहादुर पुनले ३० घरबाट सुरु भएको समाजले स्थापनादेखि हालसम्म विभिन्न आरोह–अवरोह पार गर्दै यहाँसम्म आइपुगेको स्मरण गर्नुभयो । समाजलाई यो अवस्थासम्म ल्याउन योगदान गर्ने सहयोगीदाता, पूर्वपदाधिकारी तथा सदस्यहरूप्रति उहाँले आभार व्यक्त गर्नुभयो ।

विसं २०६९ मा स्थापना भएको दग्नाम दर्मिजा समाजले सुरुवाती चरणमा ३० सदस्यबाट मासिक २० रुपैयाँका दरले लेबी संकलन गर्दै सामाजिक कोष निर्माण थालेको कोषाध्यक्ष रामकुमारी पुनले जानकारी दिनुभयो । उहाँका अनुसार समाजमा ७६ सदस्य आबद्ध छन् । प्रतेक सदस्यबाट चौमासिक ५०० रुपैयाँका दरले लेबी संकलन हुँदै आएको छ । समाजको कोषमा हाल ३४ लाख ४८ हजार रुपैयाँ मौज्दात रहेको उहाँले जानकारी दिनुभयो ।

कार्यक्रममा सामाजिक क्षेत्रमा अतुलनीय योगदान पुर्‍याएको भन्दै प्रतिनिधिसभा सदस्य खमबहादुर गर्बुजा ‘खम्बीर’, वडा अध्यक्ष पविन गर्बुजा र धनिलाल गर्बुजालाई सम्मान गरिएको थियो ।

समाजका अध्यक्ष श्यामप्रसाद थजालीको अध्यक्षता, उपाध्यक्ष खेमलाल गर्बुजाको स्वागत तथा सचिव फुलबहादुर गर्बुजाको सञ्चालनमा कार्यक्रम सम्पन्न भएको थियो । समारोहमा आमा समूहको सांगीतिक प्रस्तुति रहेको कार्यक्रममा समाजका सदस्य, शुभेच्छुक लगायत दग्नामवासीको उल्लेखिय सहभागिता रहेको आयोजकले जनाएको छ ।

प्रकाशित मिति: आइतबार, माघ २८, २०८० १३:४७