निःशुल्क मुटु परीक्षण तथा उपचार शिविरको पहिलो दिन ५६५ जनाले सेवा लिए (तस्बिर/भिडिओ)

राष्ट्रिय

गृहपृष्ठ
निःशुल्क मुटु परीक्षण तथा उपचार शिविरको पहिलो दिन ५६५ जनाले सेवा लिए (तस्बिर/भिडिओ)

म्याग्दी न्युज संवाददाता मंगलबार, चैत १९, २०८१

म्याग्दी । म्याग्दी सदरमुकाम बेनीमा निःशुल्क मुटु परीक्षण तथा उपचार शिविर सुरु भएको छ । जिल्ला समन्वय समिति म्याग्दीसहित जिल्लाका ६ वटै स्थानीय तहको संयुक्त आयोजना र शहीद गङ्गालाल राष्ट्रिय हृदय रोग केन्द्र काठमाडौँको प्राविधि सहयोगमा मङ्गलबारदेखि बेनी स्थित म्याग्दी बमुखुखी क्याम्पसमा शिविर सञ्चालन गरिएको हो ।

शिविरको पहिलो दिन म्याग्दी र पर्वतको जलजला गाउँपालिकाका मुटु रोगीहरूले सेवा लिएका छन् । दुई दिनसम्म सञ्चालन हुने शिविरमा मुटुरोगसम्बन्धी विशेषज्ञ सेवा प्रदान गरिएको जिल्ला समन्वय समितिका उपप्रमुख डिलकुमारी खत्रीले जानकारी दिनुभयो । शिविरको पहिलो दिन ५६५ जनाको परिक्षण गरिएको छ । सोही अवसरमा ५२ बढी प्रकारका औषधीहरु निशुल्क वितरण गरिएको जिसस म्याग्दीका शाखा अधिकृत तथा शिविर र तालिम सहजिकरण समिति संयोजक अमृत सुवेदीले जानकारी दिनुभयो । उहाँका अनुसार ,जनस्वास्थ्य कार्यालयको तालिम हलमा सञ्चालित सिपिआर तालिममा ८७ जना सहभागी भएका छन् । तालिम भोलीसम्म सञ्चालन हुनेछ ।

शिविरमा मुटुरोग विशेषज्ञबाट मुटुको परीक्षण तथा परार्मश, सुगर, इसिजी, ईको तथा रक्त परीक्षण गरिएको शहीद गङ्गालाल राष्ट्रिय हृदय रोग केन्द्र काठमाडौँका निर्देशक डा. रबी मल्लले जानकारी दिनुभयो । रघुगंगा गाउँपालिका अध्यक्ष भवबहादुर भण्डारीले आफुहरुको आग्रहमा शिविर सञ्चालनमा सहयोग गरेकोमा निर्देशक डा.मल्ललाई धन्यवाद व्यक्त गर्नुभयो । यस अघि उहाँकै पहल र डा.मल्लको सहयोगमा रघुगंगामा पनि शिविर सञ्चालन गरिएको थियो । शिविरमा प्रदेश अस्पताल बेनीले शिविरलाई सफल पार्न स्वाथ्यकर्मीहरू परिचालन गरेको छ ।शिविरमा म्याग्दी उद्योग वाणिज्य सङ्घ, राखु कल्याणकारी समाज, म्याग्दी जेसीज, नेपाल रेडक्रस सोसाईटी,ओमकुमारी शान्ति कोष र म्याग्दी बहुमुखी क्याम्पसले स्ववियु स्वंयमसेवक परिचालन गरेका छन् ।

[embed]https://youtu.be/rg70a5ZuZNk[/embed]

प्रकाशित मिति: मंगलबार, चैत १९, २०८१ १९:१४