बेनी । दुईदिन सम्म बेनीमा संचालन भएको निशुल्क मुटुरोग परीक्षण तथा उपचार शिविरबाट एघारसय भन्दा लाभान्वित भएका छन् ।जिल्ला समन्वय समिति म्याग्दी सहित जिल्लाका ६ वटै स्थानीय तहको आयोजना र शहीद गंगालाल राष्ट्रिय हृदयरोग केन्द्र काठमाण्डौंको प्राविधिक सहयोगमा मंलबार र बुधबार संचालित शिविरको पहिलो दिन ५ सय ६५ र दोस्रो दिन ५ सय पचास गरी एकहजार एकसय १५ जनाले सेवा लिएका हुन । शिविर म्याग्दी बहुमुखी क्याम्पसमा संचालन गरिएको थियो ।
शिविरमा परीक्षणपछि १३ जनालाई सहिद गंगालाल राष्ट्रिय हृदय रोग केन्द्रमा थप उपचारका लागि सिफारिस गरिएको जिल्ला समन्वय समितिका शाखा अधिकृत तथा शिविर संयोजक अमृत सुवेदीले जानकारी दिनुभयो । उहाँका अनुसार मुटुरोगी विरामीलाई जयन्ति स्मृति प्रतिष्ठानले यातायातको व्यवस्था मिलाएको छ ।
यस्तै शिविरमा ९ जना जन्मजात मुटुरोगीको पहिचान भएको उहाँले बताउनुभयो । शिविरमा ग्रामिण क्षेत्रबाट धेरै मुटुरोगीहरुले उपचार तथा परीक्षण सेवा लिएको जिल्ला समन्वय समितिका उपप्रमुख डिलकुमारी खत्रीले जानकारी दिनुभयो । शिविरमा ५२ बढी प्रकारका औषधिहरु निशुल्क वितरण गरिएको थियो । यसैगरी ८७ जनालाई दुई दिने सिपिआर तालिम समेत प्रदान गरिएको छ ।
शिविरमा मुटुरोग विशेषज्ञबाट मुटुको परीक्षण तथा परार्मश, सुगर, इसिजी, ईको तथा रक्त परीक्षण गरिएको शहीद गंगालाल राष्ट्रिय हृदय रोग केन्द्र काठमाडौँका निर्देशक डा. रवि मल्लले जानकारी दिनुभयो ।शिविरमा प्रदेश अस्पताल बेनीले शिविरलाई सफल पार्न स्वाथ्यकर्मीहरू परिचालन गरेको थियो भने जिल्ला स्थित विभिन्न संघसंस्थाहरुले स्वयमसेवक परिचालन गरेका थिए । म्याग्दी उद्योग वाणिज्य संघ, राखु कल्याणकारी समाज, म्याग्दी जेसीज, नेपाल रेडक्रस सोसाईटी,ओमकुमारी शान्ति कोष र म्याग्दी बहुमुखी क्याम्पसले स्वंयमसेवक खटाएका थिए ।
प्रकाशित मिति: बिहीबार, चैत २१, २०८१ ०९:०२
