म्याग्दी । बालाचतुदर्शी पर्वको अवसरमा म्याग्दीको बेनी नगरपालिका-९,स्थित प्रशिद्ध धार्मिकस्थल गलेश्वर धाममा करिब तीस हजार भक्तजनले बुधबार शतबीज छर्नुका साथै कालीगण्डकी नदीमा स्नान र गलेश्वर शिवालय मन्दिरको दर्शन गरेका छन् ।
[embed]https://youtube.com/watch?v=W5L2FnBkgaU&si=FHYXs2z6HRsdWaqR[/embed]
गलेश्वर धामस्थित रघुगङ्गा र कालीगण्डकी नदीको सङ्गमस्थलमा स्नान गरेर शिवालय मन्दिरमा शतबीज छर्ने भक्तजनहरूको कारण गलेश्वर क्षेत्रमा श्रद्धालु भक्तजनहरूको चहलपहल बढेको थियो । बाजागाजा र भजनकीर्तन सहित भक्तजनहरू गलेश्वरमा शतबीज छर्न आए।
आज बिहान ५ बजे देखि नै पितृ उद्धारको कामना गर्दै शिवालय क्षेत्रमा शतबीज छर्नेको भीड लागेको गलेश्वर क्षेत्र विकास कोषका अध्यक्ष माधवप्रसाद रेग्मीले बताउनुभयो । शतबीज छर्न भक्तजनहरू मङ्गलबार राति नै गलेश्वरधाममा आइपुगेका थिए । शिवालयमा शतबीज छर्नाले मृत आत्माले वर्षभरि खान पाउने तृप्ति हुने विश्वास गरिन्छ ।
गलेश्वर धाममा शतबीज छर्न यसपाली म्याग्दी, बागलुङ, पर्वत, पोखरा ,झापा, मोरङ, विराटनगर र काठमाडाैँ लगायतका जिल्लाहरूबाट भक्तजनहरू आएको कोषका अध्यक्ष रेग्मीले जानकारी दिनुभयो ।
हरेक वर्ष मङ्सिर कृष्ण चतुर्दशीका दिन जौँ, धान, कालो तिल, गहुँ, तोरी, मास, केराउ, लावा, मुला, ज्यामिर, सखरखण्ड, पिँडालु र हलेदोका टुक्रा शतबीजका रूपमा छर्ने गरिन्छ । उहाँका अनुसार शतबीज छर्न आउने भक्तजनहरूको सहजताका लागि सुरक्षाकर्मी र स्यमसेवकहरू परिचालन गरिएको थियो ।
देशभरबाट गलेश्वर शिवालयमा आउने भक्तजनहरूलाई पालैपालो शिवालयको दर्शन गर्न र सहज रूपमा मन्दिर परिसरबाट पवित्र कालीगण्डकी नदीसम्म शतबीज छर्ने वातावरण बनाइएको उहाँले बताउनुभयो ।
साथै बालाचतुर्दशी पर्वका अवसरमा गलेश्वर क्षेत्रमा बाँस र निगालोबाट बनेका डाला,नाङ्ला र दारको काठबाट बनाइएको ठेकी बिक्रीका लागि व्यवसायीहरू समेत आएका छन् ।
बाला चतुर्दशीका अवसरमा शिवालय मन्दिर र परिसरलाई सरसफाई र रङरोगन गरेर चिटिक्क पारिएको छ । परापूर्वकालदेखि नै गलेश्वर शिवालयमा बालाचतुर्दशी पर्वको अवसरमा शतबीज छर्ने परम्परा र संस्कृति रहेको र शतबीज छर्दा मनोकाङ्क्षा पूरा भइ पुण्य लाभ हुने जनविश्वास छ । कालीगण्डकी नदी किनारमा एउटै नौ रोपनी चक्रशिलामा अवस्थित गलेश्वर शिवालय विश्वकै अलौकिक तिर्थस्थलको रूपमा समेत परिचित छ ।
प्रकाशित मिति: बुधबार, मंसिर ३, २०८२ १८:०९
