म्याग्दी, ९ जेठ । म्याग्दीको रघुगंगा गाउँपालिका–३ मौवाफाँटस्थित ज्ञानोदय माध्यमिक विद्यालयमा किशोरीहरूका लागि आत्मरक्षा तालिम सञ्चालन गरिएको छ । एकीकृत सेवा कार्यालय म्याग्दीको आयोजनामा सञ्चालन भएको तालिममा विद्यालयका कक्षा ६ देखि १० सम्म अध्ययनरत छात्राहरूको सहभागिता रहेको छ ।
तालिमको उद्घाटन गर्दै विद्यालय व्यवस्थापन समितिका अध्यक्ष कमल खत्रीले किशोरीहरूको भौतिक सुरक्षासँगै विद्युतीय माध्यमबाट हुने हिंसाबाट बच्न पनि तालिमले सहयोग पुग्ने बताउनुभयो । उहाँले किशोरीहरूलाई सचेत र सुरक्षित बनाउन यस्ता तालिम आवश्यक रहेको उल्लेख गर्दै यसले आत्मविश्वास अभिवृद्धि गर्न समेत मद्दत पुग्ने बताउनुभयो ।
कार्यक्रममा जिल्ला प्रहरी कार्यालय म्याग्दीका प्रहरी निरीक्षक सागर तिमिल्सिनाले किशोरीहरूलाई आफू, परिवार र समाजलाई सुरक्षित राख्न तालिमले उत्प्रेरित गर्ने बताउनुभयो । उहाँले समाजमा महिला तथा किशोरीमाथि हुने हिंसा र दुर्व्यवहारका घटना बढ्दै गएकाले आत्मरक्षा तालिम आवश्यक रहेको उल्लेख गर्दै यसले किशोरीहरूको आत्मबल बढाउने, नेतृत्व क्षमता विकास गर्ने तथा समाजमा सचेतना फैलाउन सहयोग पुग्ने विश्वास व्यक्त गर्नुभयो ।
एकीकृत सेवा कार्यालयका प्रमुख सम्सेर घर्ति क्षेत्रीले किशोरीहरूलाई सक्षम र सुरक्षित बनाउन कार्यक्रम आयोजना गरिएको बताउँदै आगामी दिनमा पनि यस्ता कार्यक्रमलाई निरन्तरता दिइने जानकारी दिनुभयो ।
तालिममा प्रशिक्षकहरूले किशोरावस्थाका जोखिम, ध्यान दिनुपर्ने विषय, बालविवाह तथा त्यसले समाजमा पार्ने प्रभाव र असरलगायतका विषयमा प्रशिक्षण दिएका थिए । त्यसैगरी दैनिक जीवनमा आइपर्न सक्ने जोखिमपूर्ण अवस्थाबाट कसरी सुरक्षित रहने, मानसिक रूपमा बलियो बन्ने तथा आवश्यक अवस्थामा आफूलाई कसरी जोगाउने भन्ने विषयमा समेत प्रशिक्षण दिइएको थियो । सहभागी किशोरीहरूलाई शारीरिक अभ्याससहित विभिन्न आत्मरक्षा प्रविधिबारे व्यवहारिक अभ्यास गराइएको थियो ।
दुई दिनसम्म सञ्चालन हुने तालिममा जिल्ला प्रहरी कार्यालय म्याग्दीका प्रहरी निरीक्षक तिमिल्सिना, प्रहरी सहायक हवल्दार आकाश भित्रिकोटी, प्रहरी जवानहरू हेमा बडाल, गुन्जबहादुर नेपाली र भूमिसरा राम्जालीले प्रशिक्षण दिनुभएको छ । कार्यालय प्रमुख घर्ति क्षेत्रीको अध्यक्षतामा सम्पन्न कार्यक्रमको सञ्चालन प्राविधिक सहायक उपेन्द्रबहादुर बस्नेतले गर्नुभएको थियो ।
