काठमाडौँ ।‘जुवाडे’बाट बरामद चेक कानुनी प्रक्रिया नलगेर फिर्ता गरेको घटना छानविन गर्न गठित समितिले प्रतिवेदन बुझाएको छ । महानगरीय प्रहरी परिसर काठमाडौंका तत्कालीन प्रहरी वरिष्ठ उपरीक्षक (एसएसपी) अशोक सिंहले कानुनी प्रक्रिया छलेर २ करोड २९ लाखको बरामद चेक आरोपीलाई नै फिर्ता दिनुभएको थियो ।
अपराध अनुसन्धान विभागका डीआईजी राजेश कुमारलाल कर्ण नेतृत्वको समितिले छानविन पुरा गरेर प्रहरी महानिरीक्षक शैलेश थापा क्षेत्रीलाई प्रतिवेदन बुझाएको छ । २०७८ पुस १३ मा गठन भएको समितिले प्रतिवेदन बुझाउँदै एसएसपी सिंहले आचरण विपरित त्रुटिपूर्ण काम गरेको ठहर गरेको छ । छानविन समितिले प्रतिवेदन बुझाएको प्रहरी प्रवक्ता (एसएसपी) विष्णुकुमार केसीले बताउनुभयो ।
एसएसपी केसीले भन्नुभयो–‘छानविन समितिले बुझाएको प्रतिवेदन कार्यान्वयनको प्रक्रियामा गएको छ ।’ असोज २२ मा सिन्धुलीका राजकुमार बराल र सुभाष भेटवाल बानेश्वरस्थित ‘९९ आना’ नामको घरजग्गा कारोबार गर्ने अफिसमा जुवा खेलेका थिए । त्यहाँ आफुलाई बोलाएर मदिरामा अखाद्य वस्तु मिसाएर खुवाएको र ७ थान चेक चोरेको भन्दै बरालले उजुरी गर्नुभएको थियो ।
असोज २५ मा काठमाडौं प्रहरीले सुभाष भेटवालबाट २ करोड २९ लाखको बैंक अफ काठमाडौंको चेक बरामद गरेको थियो । सो चेक जुवा खालमा काटेको र जुवा खेलेको सिसिटिभी फुटेजमा देखिएपनि एसएसपी अशोक सिंहले करिब ३ महिना आफुसँगै राखेर सो चेक भेटवाललाई फिर्ता दिनुभएको थियो ।
छानविन समितिमा एसपी आभूषण तिम्सिना र डिएसपी सन्तोष तामाङ सदस्य थिए । बानेश्वरस्थित ‘९९ आना’ नामको घरजग्गासम्बन्धी कार्यालयबाट प्रहरीले सिसिटिभी फुटेज पनि बरामद गरेको थियो । फुटेजमा बरालको चेक अर्का जुवाडेले भरेको देखिएको अनुसन्धानमा संलग्न एकजना प्रहरी अधिकृतले बताउनुभयो ।
प्रहरीले सो कार्यालयमा छापा मारेर केही बुक तास, किताब र सिसिटिभी फुटेज पनि बरामद गरेको थियो । जुवा खेलेको र खेलाएको फुटेज भएपनि एसएसपी सिंहले मुद्दा अघि बढाउन अस्विकार गरेर लामो समय चेक आफैंसँग राख्नुभएको थियो । पुस २ मा काठमाडौं परिसरमा एसएसपी सुदिप गिरीलाई स्वागत गरेर हिँड्ने बेलामा सिंहले आरोपी भेटवाललाई बोलाएर चेक फिर्ता गर्नुभएको हो । रातोपाटीबाट
प्रकाशित मिति: बुधबार, चैत ९, २०७८ १३:५१
