बेनी । म्याग्दीको मालिका गाउँपालिका–१,निस्कोटका रक्तचाप विरामी खबहादुर घर्ती मगरको उपचारका लागि पोर्तुगल र अमेरिकामा बस्ने निस्कोटबासीहरुले आर्थिक सहयोग गरेका छन् । निस्कोट समाज पोर्तुगलका कोषाध्यक्ष सविन्द्र पुन (साजन)का अनुसार , पोखरा स्थित अस्पतालमा उपचाररत खबहादुरको उपचारका लागि निस्कोट समाज अमेरिकाबाट एक लाख र निस्कोट समाज पोर्तुगलबाट पचास हजार रुपैयाँ आर्थिक सहयोग गरिएको हो । निस्कोट समाज पोर्तुगलबाट प्राप्त सहयोग रकम खबहादुरका आफन्त हस्तबहादुर पुन ,कोषाध्यक्ष सबिन्द्रले शनिबार विरामी खबहादुरका छोरी दिपा घर्ती मगरलार्ई हस्तान्तरण गर्नुभयो ।
केही समयअघि रत्तचापका कारण बिरामी हुनुभएका खबहादुर मणिपाल शिक्षण अस्पतालमा उपचार गराउनुभएका खबहादुरले हाल हरिखर्कमा थेरापी गराउँदै आउनुभएको छ । आर्थिक अवस्था कमजोर भएका खबहादुरको उपचारमा सहयोग पुगोस् भन्ने उद्धेश्यले आर्थिक सहयोग गरिएको निस्कोट समाज पोर्तुगलका कोषाध्यक्ष सविन्द्रले बताउनुभयो । उहाँका अनुसार,पोर्तुगल र अमेरिकामा बस्ने निस्कोटबासीबाट आर्थिक सहयोग रकम संकलन गरिएको हो । निस्कोट समाज अमेरिकाबाट प्राप्त उक्त सहयोग रकम यस अघि वडा अध्यक्ष टंकप्रसाद पुनले बिरामीलाई प्रदान गर्नुभएको छ । निस्कोट समाज अमेरिका र निस्कोट समाज पोर्तुगलले यसअघि पनि गाउँका विरामी ,आगलागि पीडित लगायत क्षेत्रमा सहयोग गर्दै आएका छन् ।
