म्याग्दी। जिल्ला हुलाक कार्यालय म्याग्दीले उत्कृष्ट चिट्ठीपत्र लेख्ने विद्यार्थीलाई नगदसहित पुरस्कृत गरेको छ । बिहीबार हुलाक कार्यालयमा आयोजित कार्यक्रममा विजेता विद्यार्थीलाई नगदसहित पुरस्कृत गरिएको हो । नयाँ पुस्तालाई हुलाक र चिट्ठीपत्रको महत्त्वका बारेमा सचेतना जगाउन हुलाक कार्यालयले माध्यमिक विद्यालयस्तरीय चिट्ठी पत्र लेखन प्रतियोगिता सञ्चालन गरेको थियो ।
प्रतियोगितामा प्रथम, द्धितीय र तृतीय हुने विद्यार्थीले क्रमशः सात हजार, चार हजार र दुई हजार पाँच सय रुपियाँसहित प्रमाणपत्र प्राप्त गरेका छन् । प्रतियोगितामा म्याग्दी बहुमुखी क्याम्पसको कक्षा १२ मा अध्ययनरत सीमा बुढामगर प्रथम, प्रकाश मावि बेनीमा कक्षा ९ मा अध्ययनरत एलिस्का खत्री द्वितीय र न्यु वेस्ट पोइन्ट आवासीय मावि कक्षा १२ की रियासा जिसी तृतीय हुनुभएको जिल्ला हुलाक कार्यालय म्याग्दीका प्रमुख रमेश थापाले जानकारी दिनुभयो ।
भिडिओ हेर्नुहोस्...
[embed]https://www.youtube.com/shorts/hr5wXNBn-ko?feature=share[/embed]
कार्यालय प्रमुख थापा र नेपाल पत्रकार महासङ्घ म्याग्दी शाखाका अध्यक्ष हरिकृष्ण गौतम लगायतले नगदसहित प्रमाणपत्र वितरण गर्नुभएको थियो । प्रतियोगितामा म्याग्दीका संस्थागत तथा सामुदायिक विद्यालयका १६ जना विद्यार्थीले सहभागिता जनाएको जिल्ला हुलाक कार्यालय म्याग्दीका प्रमुख थापाले बताउनुभयो ।हुलाक सेवाका बारेमा सर्वसाधारणहरूमा सचेतना जागृत गराउँदै ‘हाम्रो हुलाकलाई राम्रो हुलाक कसरी बनाउन सकिन्छ’ शिर्षकमा चिट्ठीपत्र लेखन प्रतियोगिता गरिएको कार्यालय प्रमुख थापाले बताउनुभयो । उहाँका अनुसार, प्रतियोगितामा जिल्ला हुलाक कार्यालय, अतिरिक्त हुलाक कार्यालय तथा पालिका हुलाक कार्यालयबाट विद्यार्थीले १० को हुलाक टिकट टाँसी हुलाक कार्यालय मार्फत हस्तलिखित चिट्ठी पठाएका थिए ।
[embed]https://youtu.be/GmDlPjUscW0[/embed]
आधुनिक सूचना प्रविधिको युगमा हुलाक सेवालाई विश्वसनीय बनाउने, विद्यार्थीलाई हुलाक टिकट तथा चिट्ठीको महत्त्व बुझाउन, चिट्ठी लेखन सीप र सिर्जनशिलताको विकास गर्न प्रतियोगिताले सहयोग पुग्ने आशा गरिएको कार्यालय प्रमुख थापाले बताउनुभयो ।
प्रकाशित मिति: शुक्रबार, असोज ३, २०८२ २१:२३
