बेनी ।सिंचाइ तथा जलश्रोत व्यवस्थापन आयोजना कार्यालय पोखराले म्याग्दीमा एकैपटक चार वटा बस्ती संरक्षण आयोजनाका लागि ठेक्का आह्वान गरेको छ । निवर्तमान संघीय उर्जा ,जलस्रोत तथा सिंचाइ राज्यमन्त्री खमबहादुर गर्बुजा ‘खम्बिर’को पहलमा अन्नपुर्ण गाउँपालिकाको वडा नम्बर ४ घराप बस्ती संरक्षणका लागि एक करोड ९५ लाख ,सोही गाउँपालिकाको वडा नम्बर ३ दाना स्थित घट्टेखोला आयोजनाका लागि एक करोड ४६ लाख ,बेनी बजार संरक्षण आयोजनाका लािग एक करोड ४६ लाख र रघुगंगा गाउँपालिका–४,दग्नाम पहिरो रोकथाम आयोजनालाई करिब तीन करोड रुपैयाँको ठेक्का आह्वान भएको हो ।
सिंचाइ तथा जलश्रोत व्यवस्थापन आयोजना पोखराका प्रमुख विदुर श्रेष्ठका अनुसार , म्याग्दी सदरमुकाम बेनी नगरपालिका वडा नम्बर ७ स्थित बेनी बजार र मंगलाघाट बजारलाई म्याग्दी नदी कटानबाट जोगाउन नदी नियन्त्रण आयोजना अन्तर्गत कंक्रिट र ग्याबियन कम्पोजिट रिटेनिङ पर्खाल निर्माण ,नदी कटानबाट घराप बस्ती जोगाउन कालिगण्डकी नदी नियन्त्रण आयोजना अतर्गत कंक्रिट र ग्याबियन कम्पोजिट रिटेनिङ पर्खाल निर्माण ,घट्टेखोलामा नदी कटानबाट बस्ती र पुल जोगाउने आयोजना अन्तर्गत दुवै तिर रिटेनिङ पर्खाल र बेड बार निर्माण हुनेछन् । यसैगरी दग्नाम गाउँतलको पहिरो रोकथाम योजना अन्तर्गत ग्याबियन सहितको रिटेनिङ पर्खाल र ब्रेस्ट पर्खाल निर्माण गरिने गरि ठेक्का आह्वान गरिएको छ । निवर्तमान राज्यमन्त्री गर्बुजाले बस्ती संरक्षण आयोजनाको ठेक्का आह्वान भएको बताउनुभयो । उहाँले कार्यान्वयन हुँदा आयोजनालाई गुणस्तरीय बनाउन र तोकिएको समयमै कार्य सम्पन्न गर्न सबैले ध्यान दिनु आग्रह गर्नुभयो । आफ्नो कार्यकालमा बजेट सुनिश्चित भएका आयोजनालाई पनि कार्यान्वयनमा लैजानी गरी पहल भइरहेको उहाँको भनाइ छ ।
