म्याग्दी । नेपाली कांग्रेसको १५औँ महाधिवेशनको तयारीलाई लिएर म्याग्दीमा पार्टीको इतर समूहले जिल्ला तयारी समिति गठन गरेको छ । असोज १५ गतेदेखि सुरु हुने महाधिवेशनका लागि केन्द्रीय प्रतिनिधि ऋषि काफ्लेको उपस्थितिमा इतर समूहले हिराबहादुर पुन मगरको संयोजकत्वमा जिल्ला तयारी समिति गठन गरेको हो ।
समितिको सदस्यमा मुकुन छन्त्याल, लोकबहादुर मल्ल, ओमकुमारी फगामी मगर, बुद्धिमाया सेर्पुजा पाइजा मगर र मीनाक्षी विक रहनुभएको छ । आवश्यकता अनुसार समितिलाई विस्तार गरिने जनाइएको छ ।
संयोजक पुन यसअघि नेपाली कांग्रेस म्याग्दीको जिल्ला सचिव हुनुहुन्थ्यो । सदस्य छन्त्याल नेपाल तरुण दलका केन्द्रीय सदस्य, फगामी महासमिति सदस्य तथा मल्ल पूर्व जिल्ला समन्वय समिति म्याग्दीका उपप्रमुख हुनुहुन्छ ।
इतर समूहले आयोजना गरेको भेलामा कांग्रेस म्याग्दीका पूर्व सहसभापति नेत्रबहादुर महत, पूर्वसांसद तथा कांग्रेस नेता नरबहादुर पुन र कांग्रेस इतर समूह पर्वतका संयोजक रामकृष्ण मल्ललगायतको सहभागिता थियो ।
समितिले जिल्लाका सबै वडा र पालिकामा समेत तयारी समिति गठन गरी महाधिवेशनको तयारीलाई अघि बढाउने जनाएको छ । अहिले प्रारम्भिक रूपमा सानो आकारको समिति गठन गरिएको र आवश्यकता तथा कार्यक्षेत्रका आधारमा थप सदस्य समावेश गरिने बताइएको छ ।
संयोजक पुनले इतर समूहले नेपाली कांग्रेसको साझा पक्ष, वैचारिक चरित्र र कार्यकर्ताको निष्ठाका लागि पार्टीको विधान, वैधानिकता र एकताको पक्षमा दृढतापूर्वक आवाज उठाउने बताउनुभयो । उहाँले पार्टीलाई विभाजनतर्फ लैजानुभन्दा संवाद र सहमतिका माध्यमबाट विवाद समाधान गर्नुपर्ने धारणा राख्नुभयो ।
कांग्रेसको महाधिवेशनसँग सम्बन्धित दुवै पक्षका मुद्दा सर्वोच्च अदालतमा विचाराधीन रहेका बेला म्याग्दीमा जिल्ला सचिवसहित प्रभावशाली नेताहरू इतर समूहमा खुलेपछि जिल्लाको पार्टी राजनीतिमा नयाँ तरङ्ग देखिएको छ । यसैबीच, संस्थापन समूहले भने शनिबारदेखि वडा अधिवेशन सुरु गरेको छ ।
