काठमाडौँ । ब्रिटिस सेनाले बेलायती कम्पनीमार्फत काबुलमा कार्यरत ४ सय ३७ नेपालीलाई उद्धार गरी बेलायत लगेको छ । बेलायती कम्पनी हार्ट ल्यान्ड, हार्ट इन्टिग्रेटेड सोलुसन, गार्डा दी वल्र्डवाइड र जिफोरएस कम्पनीमा कार्यरत सुरक्षा गार्ड र कर्मचारीलाई सैन्य विमानमा दुबई हुँदै बेलायत पुर्याइएको हो ।
‘हाम्रा साथीहरूलाई मंगलबार बिहानदेखि नै काबुल विमानस्थलबाट ब्रिटिस सेनाले लैजान थालेको हो । मेरो चौथो लटमा मंगलबार तीन बजे मात्रै पालो आयो । त्यसपछि दुबईको विमानस्थलमा ल्याएर एक छिन राख्यो । अहिले बेलायत ल्याइपुर्याएको छ,’ एक नेपाली सुरक्षा गार्डले भन्नुभयो, ‘अब यहाँबाट होटल लैजाने कुरा छ । मभन्दा अगाडि उडेका साथीहरू पनि होटलमै छन् ।
त्यसपछि नियमित उडानमार्फत काठमाडौं पठाउने सुनेका छौं ।’उहाँले अफगानिस्तान छोड्न चाहने अफगान शरणार्थीसँगै आफूहरूलाई सेनाको विशेष विमानमार्फत काबुलबाट ल्याइएको बताउनुभयो । ‘हामी बस्ने जहाजमा सिट थिएन । भुइँमा पलेटी मारेर आएका हौं,’ उहाँले भन्नुभयो, ‘यस्तो बेला काबुलबाट सकुशल निस्कन पाउनु नै ठूलो भएको छ ।’
उहाँका अनुसार ब्रिटिस सेनाले बेलायती, जर्मन, जापानी, क्यानडाली कम्पनी तथा अन्तर्राष्ट्रिय दातृ निकायमा कार्यरत नेपालीको उद्धार गरेको छ । ‘दुबई आइसकेपछि उतैबाट काठमाडौं पठाइदिएको भए हुन्थ्यो । दुबईमा व्यवस्थापन गर्न कठिन भएकाले सबैलाई बेलायत नै लिएर आएको छ,’ उहाँले भन्नुभयो ।
यसअघि उनीहरूको टोली काबुल विमानस्थलनजिकैको होटलमा आएर बसेको थियो । होटल छोड्न तालिबानले आदेश दिएपछि विमानस्थलभित्र रहेको सैन्य परिसरमा बस्नुपरेको उहाँले बताउनुभयो। ‘तालिबानकै सहयोगमा विमानस्थलसम्म आउन सम्भव भयो । उनीहरूले मानवीय सहयोग देखाए,’ उहाँले भन्नुभयो।
यसअघि अमेरिकी दूतावासमा परिसरमा कार्यरत ३८५ नेपालीलाई उद्धार गरी दोहा र कुवेत लगिएको थियो । तीमध्ये ११८ जना नेपाल आइसकेका छन् । काबुलस्थित संयुक्त राष्ट्रसंघको कार्यालय र अन्य कूटनीतिक क्षेत्रमा खटिएका नेपाली सुरक्षा गार्डको अवस्था अझै सार्वजनिक भइसकेको छैन । यो टोलीले काबुल छाडेको वा कार्यालयमा सुरक्षा दिइरहेको भन्ने खुलेको छैन । ekantipurबाट
प्रकाशित मिति: बुधबार, भदौ २, २०७८ १०:५३
