बेनी । म्याग्दीको बेनी नगरपालिका–२ दारिमपाँटामा ७२ वर्षीया मनकुमारी घिमिरेको धारिलो हतियार प्रयोग गरी हत्या भएको छ । सोमबार बिहान करिब साढे ११ बजे घरमै घिमिरेमाथि घरेलु धारिलो हतियार प्रहार भएको जिल्ला प्रहरी कार्यालय म्याग्दीले जनाएको छ ।
घटनाको जानकारी पाएलगत्तै जिल्ला प्रहरी कार्यालय म्याग्दीका सूचना अधिकारी तथा प्रहरी निरीक्षक सागर तिमिल्सिनाको नेतृत्वमा प्रहरी टोली घटनास्थल पुगेको थियो । प्रहरीले घटनाको प्रकृति र कारणबारे अनुसन्धान अघि बढाएको जनाएको छ ।
हत्यामा संलग्न भएको आशंकामा मृतकका नातेदार पर्ने एक युवालाई प्रहरीले नियन्त्रणमा लिएको छ । यद्यपि, अनुसन्धान प्रभावित हुन सक्ने भन्दै प्रहरीले उनको नाम तथा अन्य विवरण सार्वजनिक गरेको छैन ।
प्रहरी निरीक्षक तिमिल्सिनाका अनुसार घटनास्थलमै रहेर अनुसन्धान भइरहेको छ । हत्या घटनाको विस्तृत विवरण अनुसन्धानपछि मात्रै सार्वजनिक गरिने प्रहरीले जनाएको छ ।
प्रकाशित मिति: सोमबार, भदौ २२, २०८३ १४:१०
